2011年1月30日 星期日

1月的最後一天

BB又大左, 真係好快!
今日係12星期了, 大概咁計即係3個月, 即係基本上可以公開我地就黎有小孩子~

今日數據:
6.27cm
預產由8月13日修正至8月12日, 8月生日既人真係越黎越多!

辛苦晒老婆了...為左做檢查等左成朝都未搞掂, lunch都未食...

2011年1月25日 星期二

久違的大病...

上星期被緊急召喚到廈門出差, 結果病住返黎...
今日已經一個星期喇, 醫生睇左, 藥又食晒, 但係d咳同喉痛就係停唔到, 唉, 估唔到要去睇第二次醫生.

希望太太唔好俾我傳染到, 如果唔係真係萬死莫辭...

2011年1月19日 星期三

大得咁快~

1月18日, 雖然我身在廈門, 但係太太都有去睇醫生, 仲見到baby!
10星期4日大, 3.88cm身長; 只係2個星期零1日, 已經由1.82cm->3.88cm! 成長速度係以"倍數"黎計! 勁啊~
真係不可思議!
醫生話bb郁下郁下中途, o係2隻腳中間見到少少野, 會唔會係子孫根呢???
bb好似好活躍咁, 雙手雙腳係咁郁, 唔怪之後佢媽咪成日唔舒服...等佢出黎之後要教訓下佢至得!
下一次去拜訪江醫生預定係3月, 唔知到時bb幾大呢?

夜晚將呢d相, 同埋消息同媽咪講左, 睇得出佢好開心同感動...
唉, 老人家冇咩望, 望係望子女生生性性, 同埋能夠傳宗接代, 俾孫佢地抱就ok.
黎緊呢幾廿年, 我要以身作則, 孝順自己父母, 外父外母, 希望可以成為bb既榜樣!

2011年1月11日 星期二

久違的威爾斯親王醫院

1月11日, 舊地重臨.
對上一次去, 應該係細佬出世o個陣...25年了.

陪老婆去登記生bb, 順便排埋期.
1月31日[唐氏綜合症]檢查
4月19日定期檢查+醫生面談
中途仲要去一次母嬰健康院檢查左先~睇黎公立醫院對香港市民生bb都ok照顧到.
自從同老細講左我就黎做爸爸, 好似寬鬆左, 就好似今日咁, 我話要陪太太去醫院佢就叫我慢慢黎...
如果唔係我自發性話OT返2個鐘, 佢都冇意思叫我補返今朝既時間.
希望黎緊既日子都有返咁上下既自由度, 咁就可以成日都去陪太太檢查喇.

太太仲係好似細個o個陣咁, 冇乜耐性~
睇黎要bb學下我至得!

2011年1月3日 星期一

嗨, 你好嗎?

2011年1月3日, 第一次同bb照面, 經超聲波.
已經見到bb, 暫時身長1.82cm, 年紀係8星期+2日 (我覺得有少少偏差), 預產期係8月13日.
你好嗎?
心跳好快係好有規律, o係媽咪入面肯定好舒服定喇.
但係你唔好成日搞到媽咪唔舒服至得o架~

原來就黎做老豆既心情真係好開心o架...
BB, 多多指教喇!