2007年12月30日 星期日

2007即將過去

呢排好似都冇乜心機搞結婚既野...
目標係過農曆年之前決定結婚日期!
啊...但係財政上其實幾緊絀...
加油!!

2007年8月31日 星期五

見面

呢個星期二晚, 我既爸爸媽媽同詩詩既爸爸媽媽終於都見左面, 講左好多話.

為左避免不必要既爭拗, 決定老人家既意, 改變o係盲年結婚既決定, 暫定2009年既舊曆二月同詩詩拉埋天窗!
好開心睇到兩家人都好支持我地, 令到我都放心好多...

(待續)

2007年8月26日 星期日

見面(序)

黎緊既星期二(8月28日)約左我同詩詩既父母出黎食飯...
希望可以拿出勇氣同佢地講:[我同阿佩想結婚!佢已經答應左嫁俾我喇!]

見完面再報告.

2007年7月24日 星期二

取了相



終於都o係7月19日拎左晒d相薄, CD, 油畫, 都咪話, 本相簿幾重下.
果然, 我諗朱生都嫌我煩, 一次過俾晒百幾張相既底片我算~~咪揀黎揀去喇.
如果一張一張咁計真係幾甘, 不過我諗冇人會咁笨o掛...

d相整體都好滿意, 雖然都睇左好多次, 但係一d都唔厭, 本相薄仲好精美添!
希望第日婚禮都會擺佢出黎.

都係出返xanga o個兩張好喇.

成地都係花o個張, 效果出奇地好, 仲好有歡欣既感覺! 唔怪得未婚妻大人咁鐘意~不過拎左黎做油畫伯友好似唔係咁滿意咁, 哈哈!

2007年6月8日 星期五

DIY Album by Sze Sze




#1 事前準備, 貼銀膠紙
#2 完成品的封面
#3 內頁.1
#4 內頁.2

上星期六同詩詩去左長沙灣一家專賣diy整相薄既鋪頭買材料, 因為銀彈有限, 加上有呢d細相辦o係手, 所以佢話要自己試下整本相薄, 到時可以同親戚朋友分享咁喎~~

就咁睇相覺得幾靚丫, 俾我就搞唔掂喇, 期待睇實物!

2007年5月23日 星期三

婚紗相 睇相篇


5月22日.
估唔到未夠12日, 已經俾石小姐call去睇相, 我地兩個set好左個budget係加多3k, 當然結果冇咁順利啦...
好不幸地, 係朱生incharge我地揀相, 佢都真係出名hardsell...
無可否認, 輯相真係影得好靚, DAVE佢地既努力實在係冇白費到啦!
我地係咁睇係咁揀, 講真, 你估我唔想張張要晒咩, 但係要錢嘛!我夠知一對一對好啦~~唉, 可惜能力有限...最後我地比原定package揀多左14張相, 仲張所有相入相簿, 珍珠相面, 配有另外5張分別係8r同5r既相...同埋一幅油畫.
不過結果係加多6k!!!!
太誇張喇...我地兩個都有少少難色...但係都講左ok...好似冇得變咁.
我的確係覺得好貴, 但係見到詩詩好鐘意,冇辦法啦...
本身諗住落少少訂先, 有咩都可以走盞嘛...所以一路都唔想俾錢住, 結果都係詩詩出手至搞掂.
我就打算第日去俾埋尾數.

5月23日
今日返完大陸, 諗住去俾錢之前, o個火車度收到詩詩電話, 話睇到網上面d人話, 要多d相底其實會抵d...我諗左諗, 又真係喎, 我都算係半個影相佬丫, 晒相呢d, 有張相底的話冇話唔得喎!
我唔得, 都仲可以搵d朋友, 網友幫手, 可惜詩詩要考試, 我就單刀赴會, 搵朱生直接研究啦.

放工去到, 一坐低, 我就用我平時做生意既技巧引導佢以為會我幫襯多d, 或者係令佢既利益增加, 我同佢講尋晚拎3張相返去, 俾人鬧點解淨係拎咁少!!
跟住朱生就開始數, 原來仲有成百幾張相, 未免太誇張o掛!?
佢話HKD128一張, 計晒的話HKD16,XXX, 我頂! 唔係咁貴啊嘛, 你俾我啊!?
可能見我驚嚇既表情啦, 佢就話其實可以齊頭HKD10,000做俾我, 拎晒D相底走都OK咁, 不過我依然係睬佢都有味咁既態度...
之後就降到HKD8,800, 我語重心長同佢講:[我今日既任務係黎揀多D相, 但係唔打算用多過尋日定既HKD6,000, 仲打算唔要尋日決定既相薄, 想要多D相底為主, 你唔好迫我喇.]
我見佢都有少少無奈喇, 不過冇計啦, 我係冇錢嘛!有既豪D有乜所謂呢~
之後佢話HKD7,000, 包20張既相簿珍珠面, 全部相底等, 我其實有少少動搖, 如果係HKD6,500, 我諗我唔駛問詩詩都已經落左搭喇...黎到呢個決定性既關口, 我都要問一問詩詩至得!
果然佢都唔想我地再花錢o係呢度喇, 好, 再次拒絕朱生呢個offer!

最後經過我多番努力後, 變成加HKD6,000, 要130張相底, 20張一本既相薄(絨面), 一張油畫, 放棄左D大相. 身為影相佬, 我相信我只要有相底, 就夠喇!

最最最後, 朱生見我眼甘甘咁望住D相辦, 可能佢都覺得我唔會再揀喇, 就話俾晒我~
哈, 唔理佢賺我地幾多錢, 我覺得真係幾值得喇, 除返都係幾廿蚊張相.

最後成輯搞左成皮野有多...買到兩SET 400DKIT咁滯喇...好彩詩詩同我一人一半...
唉我會努力搵錢o架喇.

Anyway, 我對自己講價既能力信心大增喇, 估唔到平時傾生意既技巧可以用o係呢d地方度!

2007年5月13日 星期日

婚紗相 正式拍攝


5月12日, 等左幾個月終於都到我地影緍紗相.
晨早11點半去到STUDIO, 感覺都幾殘舊下, 好在內籠裝修還可以.
詩詩大人化粧連換衫竟然搞左成兩個鐘, 實在太誇張!
好彩我飽受等待人既訓練, 間中搵D書睇下, 聽下歌, 撩人吹下水, 咁就過左.

上星期朏阿DAVE, 問過佢話可以拎埋部機黎影幾張相, 估唔到o個幾張相最後變左好多張...實在太好喇, 慳返唔少!!! 不過睇黎會o係著婚紗既相度大出血...

的確阿DAVE同GORDON既技術實在高明, 影完之後睇返d相只係得一個[嘩]字, 好多都好靚!
影得我未婚妻咁靚梗係要表揚一下啦! 所以我就私陶腰包請食下午茶, 算係咁啦~

經過呢一日...我發現原來俾人影仲難過影人, 呢個係我個人既體會...不過我明白攝影師既心情, 如果被攝者唔合作的話係好辛苦既, 所以我就盡我可以接受既程度下去配合! 加上詩詩平時俾我訓練開 擺post冇難度!

再講一次...睇黎會大出血...遲d如果撩我地影外景都唔知點算...

整個過程由1130-2030, 鐵人耐力賽, 都唔知係好運定唔運! 冇其他客人我地包左全日, 而影得多又揀得多, 啊天啊!!!!

好彩我都影都好多張靚相~~最正都係上面o個張.

2007年5月10日 星期四

滿心期待

仲有兩日就係影相既日子...話晒人生第一次, 都有少少緊張.
當然不得不提及, 今次係我25歲以黎第一之化粧, 希望唔會變到怪物咁啦.
呢兩晚都要早d訓, 如果唔係影出黎唔靚喇.

2007年5月5日 星期六

結婚照 第三回

終於都去同詩詩去左新婚情報尖沙咀門市度試衫, 總共搞左兩個幾鐘.
阿朱生同阿DAVE都認得我地, 算佢地啦!
希望到時打返個折就係啦~~
阿DAVE首肯左話我可以到時用私伙野影幾張, 如果朱生唔o係度的話我諗應該可以更加自由d.

詩詩人生第一次著緍紗, 好靚女!
搞到我心砰砰跳~但係我唔可以輕易咁表露我既神情出黎, 怕醜嘛.
之後試既衫都好靚
果然女人著起緍紗就會好靚, 不變既定律.

希望影出黎都係咁靚就好!

唔...要努力d賺錢至得喇.

2007年4月23日 星期一

結婚照 第二回

4月23日, 詩詩夜晚約左陳朗芝陪佢揀衫影相...亦都因為咁, 不久後就被o摩囉迫供...招了...

唯有再搵個機會同大伙兒交待一下.

2007年4月22日 星期日

結婚照 第一回

話說2月時訂了影結婚相的PACKAGE, 予定是5月19日拍的, 結果推前了一星期, 現在是5月12日拍, 希望不會再有大的變卦.

5月5日將會到新婚情報選拍照用的服裝, 但這只是女仕的權利.

資料會不斷更新.

有這個地方真好, 不願在XANGA將揚的事也可以在這裡紀錄下來.

不得不提, 這對手錶是詩詩送給我們的訂情信物.

回顧一下.

詩詩和我二人, 開始說起談婚論嫁的事情大約是在2006年尾左右, 其後因為世伯,伯友, 我雙親的關係, 暫時得以順利進展.
雖說兩家人仍未見面, 但相信4老都知道我倆是有誠意走在一起的, 畢竟已經過了超過6個年頭.

2007年2月9日, 我倆到了灣仔會展參觀婚紗展, 去前兩人都沒有想過帶甚麼走, 只是打算開開眼界, 但是一不小心在新婚情報坐下看相後便知道不妙了...
一位叫MOMOKO的小姐, 挾著她老闆朱先生的功力, 成功令我倆人失守...的確, 被打敗了, 完完全全地打敗了. 希望即將拍的結婚相效果會很好, 我相信DAVE的功力, 相信他的器材.

2007年4月5日, 我跟詩詩到了一家私房菜館, 品嚐一頓美味的晚餐後, 我做了一件暫時來說, 一生人最帥的事情-求婚. 我相信我誠意及準備都很充足, 絕不欺場! 當然, 雖然這是一個儀式, 但我的確希望可以帶給詩詩一個好的回憶! (也免卻多年後被埋怨的危機!)

當然我絕不欺場地半跪了下來, 她點頭的一刻我真的打從心裡笑了出來, 人不就要要這樣嗎?

出一張照.


以下是我的求婚演說內容:

200745

許佩詩小姐.

請你靜靜地聽我一席話, 好快o, 所以淨係聽同望住我, 唔好應我住, ok?

我地一齊已經六年幾, 多謝你一直以黎對我既愛同支持. 我唔係一個叻仔, 又唔係十分靚仔, 更加唔係富有人家, 所以我真係好衷心咁多謝你一直都咁欣賞我同埋o係我身邊, 我覺得有你做我女朋友真係好開心.

雖然我平時唔講, 但係我知道你會感受到我對你係認真o個隻, 由一開始都冇諗過玩玩下拍散拖就算. 呢幾年當然有開心有唔開心, 唔開心既, 有時會大家互相諒解, 有時我會得到你既寬恕, 更加好多時得到你既支持同鼓勵. 而家我唔係一個成功既人, 但係我承諾日後絕對唔會俾你餓親, 要你肥肥白白, 開開心心.

未完喎! 由早排我地兩個開始談婚論嫁開始, 我已經諗緊, 大家咁熟其實仲駛唔駛真係搞求婚呢d野呢? 以前你又話要求幾次先肯嫁俾我, 咁會搞到我好頹喎!

講笑o, 為左未來幾廿年唔會俾你懷恨在心, 我決定o係我生理同心理都支持到既能力範圍內俾你一個好既回憶.

(半跪)

好喇….許佩詩小姐

請你睇睇呢個圈圈, 雖然好似好吸引, 但係要再三諗清楚, 如果你一戴上, 我就就唔俾你反悔o架喇, 一定要嫁俾我, 咩疾病貧苦, 海誓山盟我地唔講住, 我而家先承諾你- 由呢一刻到我地正式結婚o個日, 我都會係一個好好既未婚夫, 照舊好好咁照顧你, 好好地籌備我地既婚禮, 一齊解決將會面對既問題.

俾我深呼吸一下先

我愛你, 可以嫁俾我, 付託你終生俾我嘛?
呢張野留俾你, 有我簽名, 包冇走數.

序言

就讓我暫時秘密地建立一個關於我們由這一刻直到結婚當天的事情.
今天是2007年4月22日.